ابوظہبی(نمائندہ خصوصی) متحدہ عرب امارات میں پاکستان کے سفیر افضال محمود نے کہا ہے کہ انہیں توقع ہے کہ 22 اور 23 مارچ کو اسلام آباد میں او آئی سی کے وزراء خارجہ کی کونسل کے 48 ویں اجلاس میں رکن ممالک اعلیٰ سطح کی شرکت کریں گے۔امارات نیوز ایجنسی (وام) کو ایک انٹرویو میں انہوں نے بتایا کہ وہ توقع کرتے ہیں کہ او آئی سی کے تمام ممالک اعلیٰ سطح پر کونسل کے اجلاس میں شرکت کریں گے کیونکہ یہ اجلاس ایک ایسے مشکل وقت میں ہو رہا ہے جب ہمیں مل کر حل کرنے اور تعاون کی صلاحیت کو بروئے کار لانے کے لیے بہت سے مسائل کا سامنا ہے۔ انہوں نے کہا کہ ہمارے بہت سے ممالک ایک دوسرے کی مدد کر رہے ہیں اور جنوبی۔جنوب تعاون کے جذبے سے تعاون کر رہے ہیں۔ جنوبی۔جنوب تعاون سے مراد گلوبل ساؤتھ میں ترقی پذیر ممالک کے درمیان تکنیکی تعاون ہے۔افضال محمود نے کہا کہ انہیں امید ہے کہ اتحاد، انصاف اور ترقی میں شراکت کے موضوع پر ہونے والی ملاقات نتیجہ خیز ثابت ہوگی۔ انہوں نے کہا کہ او آئی سی کے رکن ممالک میں تجارت، سرمایہ کاری اور ثقافتی تعاون کے وسیع امکانات موجود ہیں۔ انہوں نے کہا کہ اجلاس کا موضوع تقریباً ہر اس چیز کا احاطہ کرتا ہے جس پر او آئی سی کے تمام ممالک کے وزرائے خارجہ کو اپنی حکومتوں کی جانب سے اور تمام مسلمانوں کے اجتماعی فائدے کے لیے بات کرنی چاہیے۔ پاکستانی سفیر نے کہاکہ وہ باہمی تشویش کے علاقائی اور بین الاقوامی امور پر تبادلہ خیال کریں گے اور انہیں ایک دوسرے کے ساتھ بات چیت کرنے اور دو طرفہ تعاون پر تبادلہ خیال کرنے کا موقع ملے گا۔انہوں نے کہا کہ سب سے اہم چیز جس کے بارے میں اس اجلاس میں بات کی جائے گی وہ اتحاد ہےجس کی اس وقت دنیا میں پہلے سے کہیں زیادہ ضرورت ہے۔ انہوں نے کہا کہ OIC-CFM یوم پاکستان کے موقع پر ہورہا ہے اور اجلاس میں شریک وزراء خارجہ کو اس دن ہونے والی پریڈ میں بطور مہمان خصوصی شرکت کے لیے مدعو کیا جائے گا۔ افضال محمود نے کہاکہ ہم اس خصوصی موقع پر OIC وزراء خارجہ کا پاکستان میں خیرمقدم کرنے کے منتظر ہیں۔ وزراء خارجہ ہمارے 75 ویں یوم پاکستان کی تقریبات میں مہمان خصوصی ہوں گے۔ انہوں نے بتایا کہ متحدہ عرب امارات نے اس میں اپنی شرکت کی تصدیق کر دی ہے۔پاکستانی سفیر کا کہنا ہےکہ پاکستان اور متحدہ عرب امارات کے درمیان انتہائی خوشگوار تعلقات ہیں اور تمام مسائل پر باقاعدگی سے تبادلہ خیال کیا جاتا ہے۔انہوں نے متحدہ عرب امارات کے وزیر مملکت کو ملاقات میں شرکت کی دعوت دی۔ پاکستان نے چار مواقع پر OIC CFM کی میزبانی کی ہے۔ انہوں نے کہا کہ پاکستان نے دسمبر 1970 میں دوسرے اجلاس، مئی 1980 میں 11 ویں اجلاس، اپریل 1993 میں 21 ویں اور مئی 2007 میں 34 ویں اجلاس کی میزبانی ۔ اسکے علاوہ او آئی سی وزراء خارجہ کے پہلے اور17ویں غیر معمولی اجلاس اسلام آباد میں جنوری 1980 اور دسمبر 2021 میں منعقد ہوئے۔قبل ازیں ایک میڈیا بریفنگ میں پاکستانی سفیر نے بتایا کہ یہ سیشن افغانستان میں ہنگامی انسانی صورتحال سے نمٹے اور 17ویں غیر معمولی اجلاس کے دوران کیے گئے فیصلوں کا جائزہ لینے کا موقع بھی فراہم کرے گا۔ انہوں نے عالمی برادری پر زور دیا کہ وہ افغانستان کے لوگوں کی مدد کریں تاکہ وہاں انسانی بحران کو روکا جا سکے۔ انہوں نے کہا کہ ہم متحدہ عرب امارات سمیت ان تمام ممالک کے شکر گزار ہیں جنہوں نے افغان مہاجرین کی مدد کی ذمہ داری میں ہم سے اشتراک کیا ہے۔