اسلام آباد (این این آئی)وفاقی حکومت نے پندرہ اکتوبر کو بیرون ممالک میں کام کر نے والے مزدورں کیلئے صحت کارڈ جاری کر نے کااعلان کرتے ہوئے کہاہے کہ وزیراعظم کی ہدایت پر ریاست پاکستان بیرون ملک مقیم مزدوروں کو علاج کی سہولت فراہم کریگی، 17 اگست کو وزیراعظم اہم اعلان کریں گے،14 اگست کو کشمیر کے ساتھ اظہار یکجہتی منا رہے ہیں۔15 اگست کو ہم یوم سیاہ کے طور پر منائیں گے۔ وزیراعظم کے معاونین خصوصی زلفی بخاری کے ہمراہ پریس کانفرنس سے خطاب کرتے ہوئے ڈاکٹر ظفر مرزا نے کہاکہ وزیراعظم عام عوام،غریب طبقے اور مستحق افراد کے لیے درد دل رکھتے ہیں۔ انہوں نے کہاکہ صحت سہولت پروگرام ملک کے 43 اضلاع میں چل رہا ہے۔انہوں نے کہاکہ تھرپارکر اور فاٹا کے ضم ہونے کے بعد وہاں بھی یہ سہولت فراہم کی گئی ہے۔انہوں نے کہاکہ 17 اگست کو وزیراعظم ایک اعلان کریں گے۔انہوں نے کہاکہ وزارت سمندرپارپاکستانیز اور وزارت صحت نے مل کر بیرون ملک مقیم پاکستانیوں کے لیے پروگرام مرتب کیا ہے۔انہوں نے کہاکہ جو پاکستانی مزدور اور ضرورت مند لوگ ملک سے باہر ہیں ان کے خاندانوں کو بھی صحت پروگرام میں شامل کریم گے۔
زلفی بخاری نے کہاکہ جو پاکستانی مزدور بیرون ملک جاتے ہیں انکو بھی صحت کارڈ دیں گے۔ انہوں نے کہاکہ مزدور لوگ محنت کرنے اپنے خاندان کو چھوڑ کر بیرون ملک جاتے ہیں۔انہوں نے کہاکہ بیرون ممالک میں لیبر کیمپس کے دورے بھی کیے ہیں،عمومی طور پر مزدور طبقہ قرض لے کر بیرون ملک جاتا ہے۔انہوں نے کہاکہ غربت اور مشکلات کے باعث بعض لوگ غلط کام کرنے پر مجبور ہو جاتے ہیں۔انہوں نے کہاکہ وزیراعظم عمران خان کا شکریہ ادا کرتا ہوں کہ انہوں نے اس طبقے کے لیے اقدامات کیے۔انہوں نے کہاکہ ظفر مرزا اور وزارت صحت نے اس پر بہت تیزی سے کام کیا ہے۔15 اکتوبر سے بیرون ملک جانے والے مزدوروں کے لیے صحت سہولت کا آغاز کرنے جا رہے ہیں،جو بھی مزدور باہر جائیں گے وزارت صحت اور وزارت سمندرپارپاکستانی مل کر ان کے علاج کا خرچہ برداشت کریں گے۔انہوں نے کہاکہ حکومت کا سمندرپارپاکستانیوں کے لیے یہ بڑا اقدام ہے۔
ڈاکٹر ظفر مرزا نے کہاکہ یہ سہولت جو نئے لوگ جائیں گے ان کیلئے ہو گی۔،ڈاکٹر ظفر مرزا نے کہاکہ پرانے لوگ جو بیرون ملک مقیم ہیں وہ پریمیئم ادا کر کے اس پروگرام میں شامل ہو سکیں گے۔انہوں نے کہاکہ اس پروگرام میں تمام بڑی بیماریوں کے علاج بھی ہو سکیں گے۔انہوں نے کہاکہ وزیراعظم کی ہدایت پر ریاست پاکستان بیرون ملک مقیم مزدوروں کو علاج کی سہولت فراہم کرے گی۔انہوں نے کہاکہ اس پروگرام میں پورے ملک سے بیرون ممالک جانے والے مزدور شامل ہونگے۔زلفی بخاری نے کہاکہ 14 اگست کو کشمیر کے ساتھ اظہار یکجہتی منا رہے ہیں،15 اگست کو ہم یوم سیاہ کے طور پر منائیں گے۔انہوں نے کہاکہ بیرون ممالک میں مقیم پاکستانیوں سے درخواست ہے 15 اگست کو بھارتی قونصلیٹ کے باہر احتجاج کریں۔انہوں نے کہاکہ میں خود بھی 15 اگست کو لندن میں انڈیں ہائی کمیشن کے سامنے احتجاج میں شرکت کروں گا۔