کینبرا: آسٹریلیا میں نیشنل امیچور شارٹ فلم فیسٹیول کے تحت اسکالر شپ حاصل کرنے والے طالبات کی جانب سے پاکستان کے مختلف ثقافتی رنگوں کو اُجاگر کرنے والی شارٹ فلمز کی نمائش کی گئی ہے۔
رپورٹ کے مطابق پاکستانی ثقافت اور سیاحت کے فروغ کے لیے وزارت اطلاعات و نشریات کی طرف سے نیشنل امیچور شارٹ فلم فیسٹیول کا انعقاد کیا گیا تھا جوکہ پاکستان کے ذہین نوجوانوں کو اپنی صلاحیتیں دنیا کے سامنے لانے کا بہترین موقع فراہم کر رہا ہے۔
نیشنل امیچور شارٹ فلم فیسٹیول کی جانب سے اسکالر شپ حاصل کرنے والے طلبا و طالبات کو فلم میکنگ میں ایک سال کا ڈپلومہ حاصل کرنے کے لیے نیویارک فلم اکیڈمی گولڈ کوسٹ آسٹریلیا بھیجا گیا ہے جہاں وہ جدید فلم میکنگ کے متعلق تربیت حاصل کر رہے ہیں۔
یومِ پاکستان کی مناسبت سے ان پاکستانی طالبات نے آسٹریلیا میں ‘پاکستان سے محبت کے خطوط’ کے نام سے ایک تقریب کا اہتمام کیا۔اس تقریب میں پاکستان کے مختلف ثقافتی رنگوں کو اُجاگر کرنے والی شارٹ فلمز کی نمائش کی گئی۔
اِس تقریب میں آسٹریلیا میں مقیم پاکستانی اور غیرملکی افراد نے دور دراز سے شرکت کی اور اِن با صلاحیت پاکستانی نوجوانوں کی بہترین اور اعلیٰ شارٹ فلمز کو خوب سراہا۔