کوئٹہ( آن لائن ) صوبہ بلوچستان کے دارالحکومت کوئٹہ میں مدرسے میں دھماکہ ہوا ہے جس میں 5 افراد کے جاں بحق ہونے کی اطلاعات ہیں۔ابتدائی اطلاعات کے مطابق دھماکہ کوئٹہ کے قصبے کچلاک میں ایک مدرسے میں ہوا، ریسکیو ذرائع کے مطابق دھماکہ نماز جمعہ کے دوران ہوا۔ریسکیو ذرائع کا کہنا ہے کہدھماکے میں 5 افراد جاں بحق ہوئے ہیں جبکہ 11 زخمی ہوئے ہیں۔ زخمیوں کو مفتی محمود اسپتال منتقل کیا جا رہا ہے۔ فورسز کی بھاری نفری اور ریسکیو ٹیمیں جائے وقوع پر پہنچ گئی ہیں۔اس سے قبل 6 اگست کو بھی کوئٹہ ٹک ٹک گلی شو مارکیٹ میں دھماکہ ہوا تھا جس کے نتیجے میں ایک شخص جاں بحق اور 9 افراد زخمی ہوگئے تھے۔
دھماکے سے ایک دکان تباہ ہوئی جبکہ زخمیوں میں 2 بچے بھی شامل تھے۔ڈی آئی جی کوئٹہ عبد الرزاق چیمہ کا کہنا تھا کہ دہشت گرد خریدار بن کر آئے اور بارودی مواد دکان میں رکھ گئے، دہشت گردوں نے کوئٹہ کے عوام کو نشانہ بنایا ہے۔بعد ازاں وزیر داخلہ بلوچستان میر ضیا لانگو کا کہنا تھا کہ دہشت گردوں کو ہمسایہ دشمن ملک کی پشت پناہی حاصل ہے، دہشت گردی کی لہر گزشتہ 2 دہائیوں سے چل رہی ہے۔انہوں نے کہا تھا کہ ہمسایہ دشمن ملک دہشت گرد بلوچستان میں بھیج رہا ہے، ہماری سیکیورٹی فورسز ہر وقت چوکنا ہے، دہشت گردی کی جڑ تک پہنچ چکے ہیں جلد خاتمہ کردیا جائے گا۔