ممبئی: خوبرو بالی ووڈ اداکارہ اور سماجی رُکن سوارا بھاسکر رشتہ ازدواج میں منسلک ہوگئیں۔
بھارتی میڈیا رپورٹ کے مطابق اداکارہ سوارا بھاسکر نے بھارت کی سیاسی پارٹی سماج وادی کے رُکن فہد احمد سے شادی کر لی۔
وِیرے دی ویڈنگ اسٹار سوارا بھاسکر نے سوشل میڈیا پر بھی اپنی شادی کی تصدیق کی ہے کہ انہوں نے اپنی قریبی دوست فہد احمد سے کورٹ میرج کر لی ہے جس کی تصاویر اور ویڈیوز سوشل میڈیا پر وائرل ہو رہی ہیں۔
سوارا بھاسکر نے سوشل میڈیا پر فہد احمد سے شادی کی تصدیق کرتے ہوئے لکھا کہ ’ہم اکثر کسی ایسی چیز کو ڈھونڈتے ہیں جو ہمارے بےحد نزدیک ہوتی ہے ہم پیار ڈھونڈ رہے تھے لیکن ہمیں دوستی پہلے مل گئی اور پھر ہم نے ایک دوسرے کو ڈھونڈ لیا۔ فہد ضِرار احمد میرے دل میں خوش آمدید، اس میں تھوڑی افراتفری ہے لیکن یہ تمہارا ہے۔‘
اداکارہ کی جانب سے سوشل میڈیا پر شیئر کی گئی ویڈیو میں انہیں فہد احمد کے ساتھ کورٹ میرج کرتے ہوئے بھی دیکھا جا سکتا ہے جبکہ اس سے قبل اداکارہ نے مہندی کی تصاویر بھی مداحوں کے ساتھ شیئر کی تھی۔
یاد رہے کہ سوارا بھاسکر اداکارہ ہونے کے ساتھ ساتھ سیاست میں بھی دلچسپی رکھتی ہیں وہ اکثر حکومت مخالف بیانات کے باعث سُرخیوں کاحصہ بنی رہتی ہیں۔
سوارا نے کرینہ کپور کے ساتھ فلم ’ویرے دی ویڈنگ‘ میں بھی اہم کردار نبھاتی نظر آئیں تھیں جبکہ اس سے قبل وہ کئی بھارتی فلموں میں اداکاری کے جوہر دکھا چکی ہیں۔