کراچی: پاکستان شوبز انڈسٹری میں معروف فنکاروں کی جانب سے منائی جانے والی ہیلوین پارٹی کے دوران اداکارہ اریبہ حبیب اور پاکستانی آرٹسٹ یاور اقبال نے پی ٹی آئی چیئرمین عمران خان کی اہلیہ بشریٰ بی بی کا روپ دھار لیا۔
سوشل میڈیا پر تیزی سے وائرل ہونے والی ان تصاویر فنکاروں کو مختلف خوفزدہ کردینے والے روپ میں دیکھا جا سکتا ہے جبکہ اداکارہ اریبہ حبیب اور یاور اقبال نے بشریٰ بی بی کا روپ اپنایا ہوا ہے جس کی وجہ سے انہیں شدید تنقید کا سامنا ہے۔
سوشل میڈیا صارفین کا کہنا ہے کہ بشریٰ بی بی ایک پردہ دار خاتون اور سابق وزیرِ اعظم عمران خان کی اہلیہ ہیں اس طرح کی بے ہودہ پارٹی میں بشریٰ بی بی کا روپ دھارنا اور اسلامی روایات سے جڑے برقعے اور حجاب کا استعمال کرنا مذہبی روایات اور جذبات کو مجروح کرنا ہے۔
صارفین نے مزید کہا کہ یہودیوں کے تہوار کو پاکستان میں منانے اور اسلامی روایات سے جُڑے لباس کو اس تہوار کا حصہ بنانے پر سب کو ان فنکاروں کو شرم آنی چاہیے اور ہمیں ان کا بائیکاٹ کرنا چاہیے۔
یاد رہے کہ اداکارہ اریبہ حبیب اور یاور اقبال نے گزشتہ روز ہونے والی ہیوین پارٹی میں بشریٰ بی بی کے ہی جیسا حجاب اوڑھا اور سفید برقعہ بھی زیب تن کیا تھا تاہم اریبہ حبیب نے اپنے ایک بیان میں مداحوں سے معافی بھی مانگ لی ہے۔