مقبوضہ بیت المقدس(این این آئی) قریبا 90 یہودی انتہا پسندوں نے مسجد اقصیٰ کے صحن میں دھاوا بولا اور مقدس مقام کی بے حرمتی کی ہے۔عرب ٹی وی کی نشر کردہ ایک فوٹیج میں مسلمانوں کے قبلہ اول پر دھاووں میں سخت گیر اسرائیلی وزیر زراعت اوری ایرئیل کو دیکھا جا سکتا ہے۔مسجد اقصیٰ کے قریب فلسطینیوں نے فلسطینی پرچم لہرایا تھا جسے قابض فوج نے کافی پریشانی سےاتارا۔
خیال رہے کہ گذشتہ ماہ اردن کی وزارت خارجہ نے عمان میں اسرائیل کے سفیر کو طلب کرتے ہوئے مسجد اقصیٰ پر یہودی آباد کاروں کے دھاووں کی مذمت کرتے ہوئے مسجد اقصیٰ میں اسرائیلی مداخلت کو مسترد کر دیا تھا۔مشرقی بیت المقدس میں موجود تمام مقدس مقامات اور حرم قدسی اردن کے اسلامی اوقاف کے زیر انتظام ہے مگر ان مقامات پر اسرائیلی فوج اور پولیس کا تسلط قائم ہے۔