اسلام آباد (این این آئی)ڈی جی آئی ایس پی آر میجر جنرل آصف غفور نے کہا ہے کہ قوم تسلی رکھے ،مسلح افواج کسی بھی صورتحال کا مقابلہ کرنے کیلئے تیار ہے ، بھارت نے ہماری سرحدوں کی خلاف ورزی کی تو اس کو بھرپور سرپرائز دیں گے۔ہفتہ کو صحافیوں سے غیر رسمی گفتگوکرتے ہوئے ڈی جی آئی ایس پی آرمیجر جنرل آصف غفور نے کہا کہ بھارت آزاد کشمیر کو بھول جائے اب پرانا قبضہ چھڑانے کا وقت ہے۔انہوں نے کہا کہ قوم فکر نہ کرے ہماری تیاریاں مکمل ہیں۔انہوں نے کہا کہ وزیر اعظم اور آرمی چیف کا آخری حد تک جانے کا بیان فوج کا بیانیہ ہے،کشمیر کے لیے آخری فوجی آور آخری بلٹ تک لڑینگے ۔انہوں نے کہا کہ مودی نے یہ حرکت کر کہ مسئلہ کشمیر کیلئے بہت اچھا کام کیا۔
انہوں نے کہا کہ سرد خانے میں پڑا مسئلہ کشمیر پوری دنیا کے لیے فلیش پوائنٹ بن گیا۔انہوں نے کہا کہ قوم تسلی رکھے مسلح افواج کسی بھی صورتحال کا مقابلہ کرنے کے لئے تیار ہے،مسلح افواج قوم کو مایوس نہیں کرے گی۔انہوں نے کہا کہ گذشتہ تین روز میں ایل او سی پر بھارتی فائرنگ کا بھرپور جواب دیا ہے،دو روز قبل بھارت کے پانچ فوجی ہلاک ہوئے ،شہری آبادی پر فائرنگ و گولہ باری کا محتاط طریقے سے جواب دے رہے ہیں،بھارتی افواج کی متعدد ہلاکتیں ہو چکی ہیں۔انہوں نے کہا کہ پاکستان کی جانب سے موجودہ صورتحال میں سرحد پار کارروائی کشمیر کاز سے غداری ہو گی۔ترجمان پاک فوج نے کہا کہ بھارت تحریک آزادی کشمیر کو دہشت گردی سے جوڑنے کی کوشش کر رہا ہے،جیسا مسلح افواج کے سربراہ نے کہا ہم دفاع وطن کیلئے ہر حد تک جائیں گے۔انہوں نے کہا کہ اگر بھارت نے ہماری سرحدوں کی خلاف ورزی کی تو اس کو بھرپور سرپرائز دیں گے۔